ຄະນະຜູ້ແທນຂັ້ນສູງແຂວງເຊີນລາ ມາຢ້ຽມຢາມ ແລະ ເຮັດວຽກ ນໍາການນໍາແຂວງອຸດົມໄຊ ແຫ່ງ ສປປ ລາວ

ສະຫາຍ ຮວ່າງ ກວັກ ແຂັງ, ຮອງເລຂາພັກແຂວງ, ປະທານຄະນະກຳມະການປະຊາຊົນແຂວງເຊີນລາ ແຫ່ງ ສສ ຫວຽດນາມ ນຳພາຄະນະຜູ້ແທນຂັ້ນສູງແຂວງເຊີນລາ ມາຢ້ຽມຢາມ ແລະ ເຮັດວຽກ ນໍາການນໍາແຂວງອຸດົມໄຊ ແຫ່ງ ສປປ ລາວ

ໃນລະຫວ່າງວັນທີ 19-20 ພະຈິກ 2019, ກອງປະຊຸມພົບປະຂັ້ນສູງ ລະຫວ່າງ ຄະນະຜູ້ແທນຂັ້ນສູງແຂວງເຊີນລາ ແລະ ຄະນະຜູ້ແທນຂັ້ນສູງແຂວງອຸດົມໄຊ ໄດ້ຈັດຂື້ນໃນວັນທີ 20 ພະຈິກ 2019 ທີ່ຫ້ອງປະຊຸມຫ້ອງວ່າການແຂວງອຸດົມໄຊ. ສະຫາຍ ຮວ່າງ ກວັກ ແຂັງ, ຮອງເລຂາພັກແຂວງ, ປະທານຄະນະກຳມະການປະຊາຊົນແຂວງເຊີນລາ ແຫ່ງ ສສ ຫວຽດນາມ ພ້ອມດ້ວຍຄະນະ 19 ທ່ານ.

ໃນໄລຍະການພົບປະ ແລະ ເຮັດວຽກ, ຄະນະຜູ້ແທນສອງຝ່າຍໄດ້ຜັດປ່ຽນກັນລາຍງານສະພາບການຈັດຕັ້ງປະຕິບັດ ແຜນພັດທະນາເສດຖະກິດສັງຄົມຂອງແຕ່ລະແຂວງ ແລະ ທິດທາງໃນຕໍ່ຫນ້າ ໃຫ້ແຕ່ລະຝ່າຍຊາບ, ລວມທັງ ແລກປ່ຽນບົດກ່ຽວກັບການພັດທະນາຂອງແຕ່ລະແຂວງຢ່າງກົງໄປກົງມາ. ນອກນີ້, ກອງປະຊຸມໄດ້ທົບທວນ ແລະ ຕີລາຄາສູງໝາກຜົນການຮ່ວມມື ອຸດົມໄຊ ແລະ ເຊີນລາ ໃນໄລຍະປີ 2017-2019 ໃນດ້ານຕ່າງໆຕະຫລອດໄລຍະຜ່ານມາ ເຊິ່ງເຫັນວ່າ ໄດ້ນຳເອົາໝາກຜົນຕົວຈິງມາສູ່ປະຊາຊົນທັງສອງແຂວງ. ຄຽງຄູ່ກັບດ້ານດີ, ກອງປະຊຸມ ຍັງໄດ້ຖອດຖອນບົດຮຽນ ແລະ ຊອກໂອກາດເພີື່ອປັບປຸງ ແລະ ເພີ່ມທະວີການຮ່ວມມືໃນຕໍ່ຫນ້າ, ສຳຄັນຄະນະຜູ້ແທນຂັ້ນສູງສອງແຂວງຍັງໄດ້ ເຊັນບົດບັນທຶກການຮ່ວມມື ລະຫວ່າງ ອຸດົມໄຊ ແລະ ເຊີນລາ ສຳລັບສົກປີ 2019-2021 ໂດຍສຸມໃສ່ການຮ່ວມມືໃນດ້ານຕ່າງໆທີ່ມີທ່າແຮງຮ່ວມເຊັ່ນ: ການສຶກສາ, ສາທາລະນະສຸກ, ກະສິກຳປ່າໄມ້, ການຄ້າ ແລະ ການລົງທຶນ ແລະ ອື່ນໆ.

ຕະຫລອດໄລຍະການມາເຮັດວຽກຢູ່ແຂວງອຸດົມໄຊ, ທ່ານ ປອ ຄຳພັນ ເຜີຍຍະວົງ, ກຳມະການສູນກາງພັກ, ເລຂາພັກແຂວງ, ເຈົ້າແຂວງແຂວງອຸດົມໄຊ ແລະ ຄະນະ ໄດ້ໃຫ້ກຽດຕ້ອນຮັບຄະນະຜູ້ແທນຂັ້ນສູງ ເຊີນລາ ຢ່າງອົບອຸ່ນ ບົນຈິດໃຈຄວາມສາມັກຄີແບບພິເສດ ແລະ ຮ່ວມມືຮອບດ້ານ ລະຫວ່າງ ລາວ ແລະ ຫວຽດນາມເວົ້າລວມ, ເວົ້າສະເພາະແມ່ນແຂວງອຸດົມໄຊ ແລະ ແຂວງເຊີນລາ.