ຄະນະຜູ້ແທນ ສປ ຈີນ ນໍາໂດຍ: ທ່ານ ຈຽງ ຈ້າຍຕົ່ງ ເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ

ໃນລະຫວ່າງວັນທີ 29-30 ກັນຍາ – 1 ຕຸລາ 2019 ຄະນະຜູ້ແທນ ສປ ຈີນ ນໍາໂດຍ: ທ່ານ ຈຽງ ຈ້າຍຕົ່ງ ເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ພ້ອມດ້ວຍຄະນະ 8 ທ່ານ ຍິງ 2 ທ່ານ ແລະ ທ່ານ ຫຼີ ຈື້ກົງ ສະຖານກົງສູນໃຫຍ່ ສປ ຈີນ ປະຈໍາແຂວງຫຼວງພະບາງ ພ້ອມດ້ວຍຄະນະ 7 ທ່ານ; ຍິງ 5 ທ່ານ  ມາຢ້ຽມຂໍ່ານັບການນໍາແຂວງ ແລະ ວາງພວງມາລາ ຢູ່ທີ່ສຸສານນັກຮົບຈີນ, ບ້ານທ້ຽວ, ເມືອງໄຊ ແລະ ເມືອງນາໝໍ້ ແຂວງອຸດົມໄຊ.

ໂອກາດດັ່ງກ່າວຄະນະຜູ້ແທນໄດ້ຮັບການຕ້ອນຮັບຈາກທ່ານ ບຸນທັນ ສຸລິຍະວົງ ກໍາມະການພັກແຂວງ ຫົວໜ້າພະແນກການຕ່າງປະເທດແຂວງອຸດົມໄຊ ພ້ອມດ້ວຍບັນດາຫົວໜ້າພະແນກການ, ສອງກອງບັນຊາການ ປກສ-ປກຊ ແລະ ພາກສ່ວນທີ່ໄດ້ຮັບເຊີນ.  ເວລາ 08:45 ນາທີ ຂອງວັນທີ 30 ກັນຍາ 2019 ການນໍາແຂວງນໍາໂດຍ: ທ່ານ ປອ ຄໍາພັນ ເຜີຍຍະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງອຸດົມໄຊ ແລະ ທ່ານ ຈຽງ ຈ້າຍຕົ່ງ ເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ແລະ ທ່ານ ຫຼີ ຈື້ກົງ ສະຖານກົງສູນໃຫຍ່ ສປ ຈີນ ປະຈໍາພາກເໜືອລາວ ທີ່ແຂວງຫຼວງພະບາງ ພ້ອມດ້ວຍຄະນະຜູ້ແທນສອງຝ່າຍ ແລະ ນັກທຸລະກິດຊາວຈີນ ປະຈໍາແຂວງອຸດົມໄຊ ໄດ້ເດີນທາງໄປໄຫວ້ອາໄລ ແລະ ວາງພວງມາລາ ຢູ່ສຸສານນັກຮົບຈິນ ຢູ່ທີ່ບ້ານທ້ຽວເມືອງໄຊ, ແຂວງອຸດົມໄຊ ຕາງໜ້າຄະນະພັກ, ການນໍາແຂວງ ກໍ່ຄືປະຊາຊົນບັນດາເຜົ່າທົ່ວແຂວງອຸດົມໄຊ ໄດ້ສະແດງຄວາມເຄົາລົບນັບຖື ແລະ ໄຫວ້ອາໄລ ເຖິງບັນດາສະຫາຍນັກຮົບປະຕິວັດອ້າຍນ້ອງຈາກຈີນ ເຊີ່ງບັນດາສະຫາຍ ໄດ້ອຸທິດເຫື່ອແຮງ, ສະຕິປັນຍາ ແລະ ເສຍສະຫຼະຊີວິດເລືອດເນື້ອຂອງຕົນ ເຂົ້້າຮ່ວມພາລະກິດການປະຕິວັດປົດປ່ອຍຊາດ, ຕໍ່ຕ້ານການຮຸກຮານຂອງພວກຈັກກະພັດຕ່າງຊາດ ແລະ ການກໍ່ສ້າງພື້ນຖານໂຄງລ່າງຢູ່ ສປປ ລາວ ໂດຍສະເພາະແມ່ນຢູ່ແຂວງອຸດົມໄຊ.

ເວລາ 10:00 ນາທີ ຂອງວັນດຽວກັນ ທ່ານ ຈຽງ ຈ້າຍຕົ່ງ ເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ແລະ ທ່ານ ຫຼີ ຈື້ກົງ ສະຖານກົງສູນໃຫຍ່ ແຫ່ງ ສປ ຈີນ ປະຈໍາແຂວງຫຼວງພະບາງ ພ້ອມດ້ວຍຄະນະ ໄດ້ເຂົ້າຂໍານັບທ່ານ ເລຂາພັກແຂວງ-ເຈົ້າແຂວງອຸດົມໄຊ ໃນຄະນະດຽວກັນນັ້ນທ່ານ ເລຂາພັກແຂວງ-ເຈົ້າແຂວງອຸດົມໄຊ ຍັງໄດ້ກ່າວຍ້ອງຍໍຊົມເຊີຍ ເນື່ອງໃນ ວັນສະຖາປະນາສ້າງຕັ້ງ ສາທາລະນະລັດ ປະຊາຊົນຈີນ ຄົບຮອບ 70 ປີ, ພ້ອມດຽວກັນນັ້ນ ສະຖານກົງສູນໃຫຍ່ ສປ ຈີນ ປະຈໍາພາກເໜືອລາວ ທີ່ແຂວງຫຼວງພະບາງ ໄດ້ໃຫ້ການຊ່ວຍເຫຼືອເງິນ ຈໍານວນ 20 ລ້ານກີບ ແກ່ ຜູ້ທີ່ປະສົບໄພນໍ້າຖ້ວມຢູ່ເມືອງແບງ, ແຂວງອຸດົມໄຊ.

ຕອນແລງຂອງວັນດຽວກັນນັ້ນ ການນໍາແຂວງນໍາໂດຍ ທ່ານ ບຸນລອດ ອ່ອນພະຈັນ ຮອງເລຂາພັກແຂວງ ຮອງເຈົ້າແຂວງອຸດົມໄຊ ປະທານສະພາປະຊາຊົນແຂວງ ແລະ ທ່ານ ຫຼີ ຈື້ກົງ ສະຖານກົງສູນໃຫຍ່ ສປ ຈີນ ປະຈໍາແຂວງຫຼວງພະບາງ ພ້ອມດ້ວຍຄະນະສອງຝ່າຍໄດ້ອອກເດີນທາງໄປສະແດງຄວາມເຄົາລົບນັບຖື ແລະ ໄຫວ້ອາໄລ ເຖິງບັນດາສະຫາຍນັກຮົບປະຕິວັດອ້າຍນ້ອງຈາກຈີນ, ຢູ່ທີ່ສຸສານນັກຮົບຈີນ, ທີ່ເມືອງນາໝໍ້, ແຂວງອຸດົມໄຊ.