ພິທີປະກາດຮັບຮອງຂໍ້ແຂ່ງຂັນ 3 ດີ ຂອງໜ່ວຍສະຫະພັນແມ່ຍີງ ພະແນກການຕ່າງປະເທດແຂວງອຸດົມໄຊ

ພິທີປະກາດຮັບຮອງຂໍ້ແຂ່ງຂັນ 3 ດີ ຂອງໜ່ວຍສະຫະພັນແມ່ຍີງ ພະແນກການຕ່າງປະເທດແຂວງອຸດົມໄຊ ໄດ້ຈັດຂື້ນໃນເວລາ 08:00 ນາທີ ຂອງວັນທີ 08/11/2019 ທີ່ຫ້ອງປະຊຸມ ພະແນກການຕ່າງປະເທດແຂວງອຸດົມໄຊ, ໃຫ້ກຽດເຂົ້າຮ່ວມໃນພິທີໂດຍ ທ່ານ ວິໃສ ອິນດາລາ ຮອງເລຂາໜ່ວຍພັກ ຮອງຫົວໜ້າພະແນກການຕ່າງປະເທດ, ທ່ານ ນາງ ວຽງມະລີ ສຸລິໄຊ ຄະນະບໍລິຫານງານສະຫະພັນແມ່ຍິງແຂວງ ແລະ ທ່ານ ນາງ ຈິນດາວອນ ຫຼວງໄຊສີ ຮອງປະທານສະຫະພັນແມ່ຍິງໜ່ວຍພະແນກການຕ່າງປະເທດ, ພ້ອມດ້ວຍຜູ້ຕາງໜ້າ ຈາກອົງການຈັດຕັ້ງມະຫາຊົນສະມາຊິກແມ່ຍິງພາຍໃນໜ່ວຍພ້ອມທັງແຂກເຊີນຈາກອົງການຈັດຕັ້ງອ້ອມຂ້າງແຂວງ ເຂົ້າຮ່ວມທັງໝົດ 16 ທ່ານ
          ພິທີດັ່ງກ່າວ ສະຫາຍ ນາງ ຈິນດາວອນ ຫຼວງໄຊສີ ຮອງປະທານ ສະຫະພັນແມ່ຍິງໜ່ວຍພະແນກການຕ່າງປະເທດ ໄດ້ຜ່ານບົດສະຫຼຸບປະຈໍາປີ 2019 ແລະ ໄດ້ຍົກໃຫ້ເຫັນຈຸດພິເສດສະພາບການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງພາຍໃນໜ່ວຍແມ່ນໄດ້ປະຕິບັດຕາມ 04 ບາດກ້າວ ແລະ ຜົນງານອັນພົ້ນເດັ່ນຂອງໜ່ວຍສະຫະພັນແມ່ຍິງປະຈໍາປີທີ່ຜ່ານມາລວມເຖິງບາງບັນຫາທີ່ຍັງຄົງຄ້າງທີ່ຍັງຈະໄດ້ສືບຕໍ່ແກ້ໄຂ ແລະ ຈັດຕັ້ງປະຕິບັດໃນປີຕໍ່ໜ້າ, ໜ່ວຍສະຫະພັນແມ່ຍິງພະແນກການຕ່າງປະເທດ ເປັນໜ່ວຍເອກະລາດມີສະມາຊິກພາຍໃນໜ່ວຍສະຫະພັນແມ່ຍິງທັງໝົດ 12 ທ່ານ, ເຊີ່ງການເຄື່ອນໄຫວຈັດຕັ້ງປະຕິບັດຂໍ້ແຂ່ງຂັນ 3 ດີ ພາຍໃຕ້ການຊີ້ນໍາ, ນໍາພາຂອງຄະນະ   ໜ່ວຍພັກ ກໍ່ຄືຄະນະພັກຮັບຜິດຊອບ ແລະ ຄວາມເອົາໃຈໃສ່ຂອງຄະນະໜ່ວຍໂດຍການເປັນເຈົ້າການຂອງສະມາຊິກແມ່ຍິງພາຍໃນໜ່ວຍ ແລະ ພ້ອມການຈັດຕັ້ງປະຕິບັດໜ້າວຽກຂອງຕົນເອງບັນລຸຜົນສໍາເລັດຕາມຄາດໝາຍເຊີ່ງມັນໄດ້ສະແດງອອກໜ່ວຍມີສະມາຊິກແມ່ຍິງ 3 ດີ ສາມມາດຍາດໄດ້ປະເພດ 1 ໄດ້ 100% ຂອງສະມາຊິກສະຫະພັນແມ່ຍິງທັງໝົດພາຍໃນໜ່ວຍຂອງພະແນກ.

         ດັ່ງນັ້ນ, ໜ່ວຍສະຫະພັນແມ່ຍິງພະແນກການຕ່າງປະເທດ ຈິ່ງໄດ້ຮັບເປັນໜ່ວຍສະຫະພັນແມ່ຍິງ 3 ດີ ປະຈໍາປີ 2019 ເປັນກຽດມອບໃບຢັ້ງຢືນດັ່ງກ່າວໂດຍແມ່ນ ທ່ານ ນາງ ວຽງມະລີ ສຸລິໄຊ ຄະນະບໍລິຫານງານສະຫະພັນແມ່ຍິງແຂວງ ແລະ ຮັບໂດຍ ທ່ານ ນາງ ຈິນດາວອນ ຫຼວງໄຊສີ  ຮອງປະທານ ສະຫະພັນໜ່ວຍສະຫະພັນແມ່ຍິງພະແນກການຕ່າງປະເທດ.
ໂອກາດດັ່ງຍັງໄດ້ຍັງໄດ້ ຮັບຟັງການໂອ້ລົມຂອງ ທ່ານ ວຽງມະລີ ສຸລິໄຊ ຄະນະບໍລິຫານງານສະຫະພັນແມ່ຍິງແຂວງ ເຊີ່ງກ່ອນອື່ນສະຫາຍກໍ່ໄດ້ກ່າວຍ້ອງຍໍຊົມເຊີຍຕໍ່ບົດສະຫຼຸບປະຈໍາປີ ແລະ ການເຄື່ອນໄຫວວຽກງານຂອງບັນດາເອື້ອຍນ້ອງແມ່ຍິງກໍ່ຄືໜ່ວຍສະຫະພັນແມ່ຍິງພະແນກການຕ່າງປະເທດແຂວງອຸດົມໄຊ ທີ່ຍາດມາໄດ້ໃນຕະຫຼອດໄລຍະ 01 ປີ ຜ່ານມາ ທ່ານ ນາງ ວຽງມະລີ ສຸລິໄຊ ຍັງໄດ້ຮຽກຮ້ອງໃຫ້ເອົາໃຈໃສ່ສືບຕໍ່ຮັກສາມູນເຊື້ອຜົນງານກໍ່ຄືມູນເຊື້ອຂອງແມ່ຍິງລາວ, ໂດຍສະເພາະແມ່ນຮັກສາຮິດຄອງປະເພນີອັນດີງາມຂອງຊາດໄວ້ຄຽງຄູກັບສັງຄົມລາວຕະຫຼອດໄປ.