ພິທີມອບໃບຢັ້ງຢືນຂໍ້ແຂ່ງຂັນ 4 ບຸກ ໜ່ວຍຊາວໜຸ່ມ ພຕທ ປະຈໍາປີ 2019

ໃນຕອນແລງຂອງວັນທີ 8/11/2019 ຜ່ານມາທີຫ້ອງປະຊຸມພະແນກກການຕ່າງປະເທດ ໄດ້ມີພິທີມອບໃບຢັ້ງຢືນຂໍ້ແຂ່ງຂັນ 4 ບຸກ ປະຈໍາປີ 2019, ໂດຍການເປັນປະທານຂອງ ສະຫາຍ ບຸນມີນາ ຂັນທະຍົງທອງ ເລຂາ   ໜ່ວຍຊາວໜຸ່ມພະແນກການຕ່າງປະເທດ ເປັນກຽດເຂົ້າຮ່ວມ ມີສະຫາຍ  ສົມດີ ເຕຼັງເບຼຍຈື ຄະນະບໍລິຫານງານຊາວໜຸ່ມແຂວງອຸດົມໄຊ ແລະ ທ່ານ ບຸນທັນ ສຸລິຍະວົງ ກໍາມະການພັກແຂວງ, ຫົວໜ້າພະແນກການຕ່າງປະເທດແຂວງອຸດົມໄຊ ແລະ ແຂກເຊີນຈາກໜ່ວຍຊາວໜຸ່ມອ້ອມຂ້າງແຂວງ ພ້ອມດ້ວຍສະມາຊິກຊາວໜຸ່ມພາຍໃນໜ່ວຍພະແນກການຕ່າງປະເທດເຂົ້າຮ່ວມທັງໝົດ 20 ສະຫາຍ, ຍິງ 05 ສະຫາຍ.

          ໃນພິທີໄດ້ຮັບຟັງການສະຫຼຸບຕີລາຄາຜົນງານການເຄື່ອນໄຫວຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2019 ແລະ ຜ່ານທິດທາງແຜນການເຄື່ອນໄຫວຂໍ້ແຂ່ງຂັນ 4 ບຸກ ໃນປີ 2020, ໄລຍະຜ່ານມາເຫັນວ່າ ໜ່ວຍຊາວໜຸ່ມພະແນກການຕ່າງປະເທດແຂວງອຸດົມໄຊ ສາມາດຍາດໄດ້ຜົນງານຫຼາຍດ້ານ ໂດຍສະເພາະແມ່ນດ້ານການເມືອງແນວຄິດການຝຶກຝົນຫຼໍ່ຫຼອມ, ຮໍ່າຮຽນການຈັດຕັ້ງ ແລະ ດ້ານວິຊາຊີບສ້າງວຽກເຮັດງານທໍາ ເວົ້າລວມແລ້ວແມ່ນປະຕິບັດໄດ້ຕາມຄາດໝາຍ   95% ຂື້ນໄປ ໃນນັ້ນມີສະມາຊິກ 10 ສະຫາຍ ທີ່ສາມາດສ້າງລາຍຮັບເຂົ້າຄອບຄົວໄດ້ 10 ລ້ານກີບ ຂື້ນໄປ/ປີ ໂດຍອີງໃສ່ເງື່ອນໄຂຂອງແຕ່ລະຄົນ ແລະ ແຕ່ລະຄອບຄົວ ສະມາຊິກຊາວໜຸ່ມ ພຕທ ໄດ້ຮັບການຍ້ອງຍໍຈາກ ຄະນະບໍລິຫານງານຊາວໜຸ່ມແຂວງ ຈໍານວນ 20 ສະຫາຍ ຍິງ 09 ສະຫາຍ; ໃນນັ້ນ ປະເພດ I ມີ: 20 ສະຫາຍ; ຍີງ 09 ສະຫາຍ ແລະ ປະເພດ II 02 ມີ ສະຫາຍ; ຍີງ 01 ສະຫາຍ ຕໍ່ກັບບຸກຄົນທີ່ມີຜົນງານດີເດັ່ນ ເຮັດໃຫ້ໜ່ວຍຊາວໜຸ່ມພະແນກການຕ່າງປະເທດແຂວງອຸດົມໄຊ ໄດ້ຮັບໃບຢັ້ງຢືນເປັນໜ່ວຍຊາວໜຸ່ມ 4 ບຸກ ປະຈໍາປີ 2019 ເປັນກຽດມອບໂດຍ ທ່ານ ບຸນທັນ ສຸລິຍະວົງ ກໍາມະການພັກແຂວງ, ຫົວໜ້າພະແນກການຕ່າງປະເທດແຂວງອຸດົມໄຊ ແລະ ມອບໃບຢັ້ງຢືນ 4 ບຸກ ໃຫ້ໜ່ວຍຊາວໜຸ່ມພະແນກການຕ່າງປະເທດ ໂດຍ ສະຫາຍ ສົມດີ ເຕຼັງເບຼຍຈື ຄະນະບໍລິຫານງານຊາວໜຸ່ມແຂວງອຸດົມໄຊ.

ຕອນທ້າຍຂອງກອງປະຊຸມພິທີ ສະຫາຍ ສົມດີ ເຕຼັງເບຼຍຈື ຄະນະບໍລິຫານງານຊາວໜຸ່ມແຂວງ ຍັງໄດ້ມີຄໍາເຫັນໂອ້ລົມເປັນທິດຊີ້ນໍາໃຫ້ແກ່ໜຸ່ວຍຊາວໜຸ່ມພະແນກການຕ່າງປະເທດ ເພື່ອເປັນແນວທາງໃນການສືບຕໍ່ເຄື່ອນໄຫວວຽກງານໃນຕໍ່ໜ້າຕື່ມອີກ.