ພິທີໃຫ້ທິດໂອ້ລົມຂອງທ່ານເພັດສາຄອນ ຫຼວງອາໄພ ເຈົ້າແຂວງ ແຂວງອຸດົມໄຊ

ຕອນເຊົ້າເວລາ 9:00 ນາທີຂອງວັນທີ 4 ສີງຫາ 2016 ພະແນກການຕ່າງປະເທດແຂວງອຸດົມໄຊ ໄດ້ເຂົ້າຮ່ວມ ພິທີໃຫ້ທິດໂອ້ລົມຂອງ ທ່ານເພັດສາຄອນຫຼວງອາໄພເລຂາພັກແຂວງເຈົ້າແຂວງແຂວງອຸດົມໄຊຕໍ່ກັບສະມາຊີກພັກ – ພະນັກງານລັດຖະກອນພະແນກການຕ່າງປະເທດ ພິທີດັ່ງກ່າວມີຜູ້ເຂົ້າຮ່ວມທັງໝົດ 31 ສະຫາຍ, ຍີງ  9 ສະຫາຍ.

            ທ່ານ ວິແກ້ວ ບຸບຜາວັນ ເລຂາໜ່ວຍພັກ, ຫົວໜ້າພະແນກການຕ່າງປະເທດ  ໄດ້ລາຍງານສະພາບໂດຍຫຍໍ້ຂອງວຽກງານການຕ່າງປະເທດໃນໄລຍະທີ່ຜ່ານມາຕໍ່ກັບທ່ານ ເຈົ້າແຂວງ ເພື່ອຮັບຊາບ ຄະນະນັ້ນ ທ່ານ ວິແກ້ວ ບຸບຜາວັນ ຫົວໜ້າພະແນກການຕ່າງປະເທດ ກໍ່ໄດ້ສະເໜີຕໍ່   ທ່ານ ເພັດສາຄອນ ຫຼວງອາໄພ ເຈົ້າແຂວງ, ແຂວງອຸດົມໄຊ ກ່ຽວກັບ 02 ຂະແໜງການທີ່ຍັງລໍຖ້າມະຕິຕົກລົງຈາກຂະນະປະຈໍາພັກແຂວງຄື: ຂະແໜງຈັດຕັ້ງ – ກວດກາຊາຍແດນ ແລະ ຂະແໜງປະສານງານອາຊຽນ; ພ້ອມກັນນັ້ນກໍ່ໄດ້ຂໍໂກ້ຕາລັດຖະກອນໃຫ້ພະແນກການ ຕ່າງປະເທດຕື່ມອີກ.

            ທ່ານ ເຈົ້າແຂວງແຂວງອຸດົມໄຊກໍ່ໄດ້ກ່າວຍ້ອງຍໍຊົມເຊີຍຕໍ່ຜົນສໍາເລັດ ແລະ ຜົນງານການເຄື່ອນໄຫວ ວຽກງານ ພະແນກການຕ່າງປະເທດ ໃນໄລຍະທີ່ຜ່ານມາ ແລະ ໃຫ້ທິດຊີ້ນໍາສືບຕໍ່ສູ້ຊົນຕໍ່ແຜນການຈັດຕັ້ງປະຕິບັດ ວຽກງານເຊັ່ນ: ພະນັກງານທຸກຄົນຕ້ອງກໍາແໜ້ນກ່ຽວກັບນະໂຍບາຍວຽກງານການຕ່າງປະເທດຂອງສູນກາງພັກ – ວາງອອກ, ຕ້ອງກໍາແໜ້ນກົດໝາຍສາກົນ, ຍົກສູງຄວາມຮູ້, ຄວາມສາມາດ ແລະ ເອົາໃຈໃສ່ກ່ຽວກັບພາສາຕ່າງປະເທດໃຫ້ເຂັ້ມແຂງຕື່ມ, ຕິດຕາມການຈັດຕັ້ງ ແລະ ຄຸ້ມຄອງຂອງອົງການຈັດຕັ້ງສາກົນ INGOS ທີ່ມາເຄື່ອນໄຫວຢູ່ແຂວງອຸດົມໄຊໃຫ້ເຂັ້ມງວດຕື່ມອີກ, ຕ້ອງກໍາແໜ້ນບັນດານິຕິກໍາຕ່າງໆ ແລະ ພະນັກງານທຸກຄົນຕ້ອງຮູ້ຈັກໄຈ້ແຍກເພື່ອນມີດ ແລະ ສັດຕູຢູ່ສະເໝີ.

ໃນໂອກາດດັ່ງກ່າວ, ທ່ານ ເຈົ້າແຂວງແຂວງອຸດົມໄຊ ຍັງໄດ້ເໜັ້ນຕື່ມອີກວ່າ: ສິ່ງສໍາຄັນແມ່ນຄວາມສາມັກຄີພາຍໃນພະແນກຕ້ອງໃຫ້ເປັນຈິດນື່ງໃຈດຽວຊ່ວຍກັນປະຕິບັດໜ້າທີວຽກງານຕາມການມອບໝາຍ ແລະ ວິຊາສະເພາະຂອງແຕ່ລະບຸກຄົນ,ເຮັດວຽກຕ້ອງຜ່ານປະຕູດ່ຽວເພື່ອຊ່ວຍກັນພັດທະນາປະເທດຊາດກໍ່ຄືພັດທະນາ ແຂວງອຸດົມໄຊ ນັບມື້ໃຫ້ຂະຫຍາຍຕົວຂື້ນເລື້ອຍ.

ນອກຈາກນັ້ນ, ທ່ານ ວິແກ້ວ ບຸບຜາວັນ ຫົວໜ້າພະແນກການຕ່າງປະເທດ ກໍ່ໄດ້ກ່າວຂອບອົກຂອບໃຈ ແລະ ຮັບເອົາຄໍາໂອ້ລົມ, ທິດຊີ້ນໍາອັນຫາປຽບບໍ່ໄດ້ຈາກ ທ່ານ ເພັດສາຄອນ ຫຼວງອາເລຂາພັກແຂວງເຈົ້າແຂວງແຂວງອຸດົມໄຊ, ທ່ານ  ວິແກ້ວ ບຸບຜາວັນ ຫົວໜ້າພະແນກການຕ່າງປະເທດ ໃຫ້ສັນຍາວ່າ: ຈະສືບຕໍ່ປະຕິບັດຕາມພາລະບົດບາດສິດ ແລະ ໜ້າຂອງພະແນກການຕ່າງປະເທດ​ຕາມການມອບໝາຍທິດຊີ້ນໍາຈາກຂັ້ນເທິງໃຫ້ປະກົດຜົນເປັນຈິງ.
ພິທີໂອ້ລົມຂອງ ທ່ານ  ເພັດສາຄອນ ເລຂາພັກແຂວງ
ເຈົ້າແຂວງແຂວງອຸດົມໄຊ ຕໍ່ກັບສະມາຊີກພັກ – ພະນັກງານລັດຖະກອນພະແນກການຕ່າງປະເທດ ໄດ້ດໍາເນີນເປັນເວລາໜື່ງຕອນ,  ເວລາ 11: 00 ນາທີ ໄດ້ກ່າວປິດພິທີລົງດ້ວຍບັນຍາກາດເບີກບານມ່ວນຊື່ນ.