Category Archives: ຂ່າວເດັ່ນ

ທ່ານ ຮອງນາຍົກລັດຖະມົນຕີ ທອງລຸນ ສີສຸລິດ ຕ້ອນຮັບ ຮອງປະທານ ຄະນະກຳມາທິການຮ່ວມມື ຫວຽດນາມ-ລາວ

       ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບຂອງທ່ານ ຫງວຽນ ຈື້ ຢຸ້ງ ລັດຖະມົນຕີຊ່ວຍວ່າການຜູ້ປະຈຳການກະຊວງແຜນການ ແລະ ການລົງທຶນ ຮອງປະທານຄະນະ ກຳມາທິການຮ່ວມມືຫວຽດນາມ-ລາວ ແລະຄະນະໃນວັນທີ 26 ພຶດສະພາ 2014 ຢູ່ກະຊວງການຕ່າງປະເທດ ໃນໂອກາດທີ່ທ່ານເດີນທາງມາຢ້ຽມຢາມ ແລະ ເຮັດວຽກຮ່ວມກັບ ຄະນະກຳມາທິການຮ່ວມມືລາວ-ຫວຽດນາມ ໃນລະຫວ່າງວັນທີ 24-26 ພຶດສະພາ 2014 ນີ້.

     ໃນໂອກາດນີ້ ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍ ພ້ອມທັງຕີລາຄາສູງຕໍ່ ທ່ານ ຫງວຽນ ຈື້ ຢຸ້ງ ແລະ ຄະນະ ທີ່ໄດ້ເດີນທາງມາຢ້ຽມ ຢາມ ແລະ ເຮັດວຽກຮ່ວມກັບຄະນະກຳມາທິການຮ່ວມມື ລາວ-ຫວຽດນາມ ຂອງ ສປປ ລາວ ໃນຄັ້ງນີ້ຊຶ່ງເປັນການປະກອບສ່ວນອັນສຳຄັນເຂົ້າໃນ ການເພີ່ມທະວີການ ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ-ຫວຽດນາມ ໂດຍສະເພາະແມ່ນ ການພົວພັນຮ່ວມມືລະຫວ່າງ ສອງຄະນະກຳມາທິການຮ່ວມມືຫວຽດນາມ-ລາວ ແລະ ລາວ-ຫວຽດນາມ ໃຫ້ນັບມື້ນັບກວ້າງຂວາງ ແລະ ເຂົ້າສູ່ລວງເລິກເທື່ອລະກ້າວ.

       ທ່ານ ຫງວຽນ ຈື້ ຢຸ້ງ ໄດ້ສະແດງຄວາມຂອບໃຈຕໍ່ ທ່ານ ທອງລຸນ ສີສຸລິດ ທີ່ໄດ້ໃຫ້ການຕ້ອນຮັບ ອັນອົບອຸ່ນ ໃນຄັ້ງນີ້ພ້ອມທັງໄດ້ຢືນຢັນຈະເພື່ມ ທະວີສາຍພົວພັນມິດຕະພາບ ແລະ ຄວາມສາມັກຄີ ແບບພິເສດ ແລະ ການຮ່ວມມືຮອບດ້ານກັບຄະນະກຳມະທິການຮ່ວມມືລາວ-ຫວຽດນາມ ໃຫ້ນັບ ມື້ນັບກ້ວາງຂວາງຍິ່ງຂຶ້ນ.

ລາວ-ຫວຽດນາມ ສືບຕໍ່ເສີມຂະຫຍາຍການພົວພັນຮ່ວມມືດ້ານສື່ສິ່ງພິມ

     ໃນຕອນບ່າຍຂອງວັນທີ 21 ພຶດສະພາ 2014 ນີ້, ທີ່ກະຊວງຖະແຫລງຂ່າວວັດທະນະທຳ ແລະ ທ່ອງທ່ຽວ (ຖວທ), ທ່ານ ສຈ.ດຣ ບໍ່ແສງຄຳວົງດາລາລັດຖະມົນຕີວ່າການກະຊວງຖວທໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງຄະນະຜູ້ແທນໜັງສືພິມເຢິນເຢິນສຽງຂອງສູນກາງພັກຄອມມູນິດຫວຽດນາມນຳໂດຍທ່ານເລກັວນແຂັງຮອງຫົວໜ້າບັນນາທິການໃຫຍ່ໜັງສືພິມເຢິນເຢິນໃນໂອກາດເດີນທາງມາຢ້ຽມຢາມສປປ ລາວ ໃນລະຫວ່າງວັນທີ 20-25 ພຶດສະພາ 2014 ນີ້ ຕາມຄຳເຊີນຂອງຫົວໜ້າບັນນາທິການໜັງສືພິມປະຊາຊົນສຽງຂອງສູນກາງພັກ ປປ ລາວ. 
ທ່ານສຈ.ດຣບໍ່ແສງຄຳວົງດາລາໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ເລກັວນແຂັງ ທີ່ໄດ້ນຳພາຄະນະເດີນທາງມາຢ້ຽມ ຢາມ ສປປ ລາວໃນຄັ້ງນີ້ ຊຶ່ງເປັນການປະກອບສ່ວນອັນສຳຄັນເຂົ້າໃນການສົ່ງເສີມສາຍພົວພັນມິດຕະພາບ, ການຮ່ວມມື ແລະ ຄວາມເຂົ້າອົກເຂົ້າໃຈ ລະຫວ່າງ ລາວ ແລະ ຫວຽດນາມ ເວົ້າລວມເວົ້າສະເພາະລະຫວ່າງສື່ສິ່ງພິມ ລາວ-ຫວຽດນາມ ພ້ອມນັ້ນທ່ານຍັງ ໄດ້ສະແດງຄວາມຂອບອົກຂອບໃຈ ຕໍ່ລັດຖະບານຫວຽດນາມ ທີ່ໄດ້ໃຫ້ການຊ່ວຍເຫລືອທາງດ້ານວັດຖຸສິ່ງຂອງ,  ເຄື່ອງອີເລັກໂຕນິກ ຕ່າງໆ ແກ່ ສປປ ລາວ ຕະຫລອດມາ.

     ທ່ານເລກັວນແຂັງ ກໍໄດ້ກ່າວສະແດງຄວາມຂອບໃຈຕໍ່ທ່ານ ລັດຖະມົນຕີວ່າການກະຊວງ ຖວທ ທີ່ໄດ້ສະລະເວລາອັນມີຄ່າມາຕ້ອນຮັບການເຂົ້າ ຢ້ຽມຂ່ຳນັບໃນຄັ້ງນີ້ ພ້ອມທັງສະແດງຄວາມ ເສົ້າສະຫລົດໃຈ ແລະ ເສຍໃຈ ຕໍ່ການເສຍຊີວິດຂອງການນຳຂັ້ນສູງ ແລະ ພະນັກງານຈຳນວນ ໜຶ່ງທີ່ແຂວງຊຽງຂວາງ ເມື່ອວັນທີ 17 ພຶດສະພານີ້, ການຢ້ຽມຢາມໃນຄັ້ງນີ້ ເປັນການສືບຕໍ່ເສີມຂະຫຍາຍການພົວພັນຮ່ວມມື ແລະ ຫວ່າງສອງຊາດລາວ-ຫວຽດນາມໂດຍສະເພາະລະຫວ່າງ 2 ສື່ສິ່ງພິມ ຫວຽດນາມ-ລາວ ໃຫ້ນັບມື້ນັບໄດ້ຮັບການເສີມຂະຫຍາຍຂຶ້ນໄປເລື້ອຍໆ

ນາຍົກລັດຖະມົນຕີ ຕ້ອນຮັບ​ຄະນະ​ຜູ້​ແທນ​ກະຊວງ​ສັນຕິ​ບານ​ຈີນ

       ໃນຕອນບ່າຍຂອງວັນທີ 20 ພຶດສະພາ 2014 ທີ່ຫ້ອງວ່າການລັດຖະບານ, ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສາທາລະນະລັດປະຊາທິປະໄຕປະຊາຊົນລາວໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງທ່ານຮວາງມິງ(HuangMing)ລັດຖະມົນຕີຊ່ວຍວ່າການກະຊວງສັນຕິບານສປຈີນພ້ອມຄະນະ,ໃນໂອກາດເດີນທາງມາເພື່ອໄວ້ອາໄລຕໍ່ການນຳລາວ ທີ່ເສຍຊີວິດຈາກເຫດການເຮືອບິນຕົກ ທີ່ແຂວງຊຽງຂວາງ ເມື່ອເຊົ້າວັນທີ 17 ພຶດສະພານີ້.

       ທ່ານນາຍົກລັດຖະມົນຕີ ທອງສິງ ທຳມະວົງ ໄດ້ສະແດງຄວາມຊົມເຊີຍ ແລະ ຂອບອົກຂອບໃຈ ຕໍ່ທ່ານ ຮວາງ ມິງ ແລະ ຄະນະ ທີ່ໄດ້ມາຢ້ຽມຢາມລາວ ເພື່ອໄວ້ອາໄລຕໍ່ບັນດາສະຫາຍການນຳຂອງລາວ ທີ່ໄດ້ຮັບເຄາະຮ້າຍດັ່ງກ່າວ ຊຶ່ງເປັນເຫດການທີ່ບໍ່ເພິ່ງປາຖະໜາ ແລະ ເຮັດໃຫ້ ພັກ-ລັດຖະບານລາວ ສູນເສຍວິລະຊົນແຫ່ງຊາດ ແລະ ພະນັກງານການນຳປະຕິວັດທີ່ສຳຄັນ, ຜູ້ມີຜົນງານ ແລະ ຄຸນງາມຄວາມດີຕໍ່ປະເທດຊາດ.ພ້ອມດຽວກັນນັ້ນທ່ານນາຍົກລັດຖະມົນຕີຍັງໄດ້ສະແດງຄວາມເຊື່ອໝັ້ນ ຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືຮອບດ້ານ ລະຫວ່າງ ລາວ-ຈີນ ທີ່ນັບມື້ຂະຫຍາຍຕົວ.

       ໃນວັນດຽວກັນທ່ານ ຮວາງ ມິງ ກໍໄດ້ເຂົ້າພົບຄອບຄົວຂອງທ່ານ ດຣ. ທອງບັນ ແສງອາພອນ ອະດີດເລຂາທິການສູນກາງພັກ, ອະດີດລັດຖະ ມົນຕີວ່າການກະຊວງປ້ອງກັນຄວາມສະຫງົບ ເພື່ອໃຫ້ກຳລັງໃຈ ແລະ ແບ່ງເບົາຄວາມທຸກໂສກ, ຈາກນັ້ນກໍໄດ້ເຂົ້າພົບປະກັບບັນຄະນະນຳ ກະຊວງ ປ້ອງກັນຄວາມສະຫງົບ ແລະ ຄະນະນຳຂອງກະຊວງປ້ອງກັນປະເທດ ໂດຍຕາງໜ້າລັດຖະບານ ກໍຄືກະຊວງສັນຕິບານ ສປ ຈີນ, ເພື່ອສະ ແດງຄວາມເສຍໃຈຢ່າງສຸດຊຶ້ງ ຕໍ່ເຫດການທີ່ເກີດຂຶ້ນ ແລະ ການສູນເສຍການນຳທີ່ສຳຄັນຂອງລາວໃນຄັ້ງນີ້

ສຳນັກງານຜູ້ຕາງຫນ້າຖາວອນ ແຫ່ງ ສປປ ລາວ ປະຈຳ ອົງການ ສປຊ ຈັດພິທີໄຫວ້ອາໄລຕໍ່ບັນດາຜູ້ນຳພັກ-ລັດ ທີ່ປະສົບອຸບັດຕິເຫດເຮືອບິນຕົກ

         ໃນຕອນບ່າຍວັນທີ 19 ພຶດສະພາ 2014, ທີ່ ສຳນັກງານຜູ້ຕາງຫນ້າຖາວອນ ແຫ່ງ ສປປ ລາວ ປະຈຳອົງການສະຫະປະຊາຊາດ, ນິວຢອກ, ສະຫະລັດ ອາເມລິກາ, ທ່ານ ດຣ. ຂຽນ ພັນສຸຣິວົງ, ເອກອັກຄະລັດຖະທູດ, ຜູ້ຕາງຫນ້າຖາວອນ ແຫ່ງ ສປປ ລາວ ປະຈຳ ສປຊ ພ້ອມດ້ວຍພະນັກງານທັງຫມົດ 14 ທ່ານ ໄດ້ຈັດພິທີໄຫວ້ອາໄລຕໍ່ການຈາກໄປຢ່າງບໍ່ມີວັນຫວນຄືນມາ ແລະ ການສູນເສຍຄັ້ງຍິ່ງ ໃຫ່ຍບັນດາການຳພັກ-ລັດ ພ້ອມດ້ວຍຄະນະຕິດຕາມ ທີ່ປະສົບອຸບັດຕິເຫດເຮືອບິນ AN 74-300 ຕົກທີ່ແຂວງຊຽງຂວາງ ໃນຕອນເຊົ້າວັນທີ 17 ພຶດສະພາ 2014.

        ໃນ​ວັນ​ທີ 17 ພຶດສະພາ 2014, ທ່ານ ນາງ Karen Tan, ເອກ​ອັກຄະ​ລັດຖະທູດ, ຜູ້ຕາງໜ້າ​ຖາ​ວອນ ແຫ່ງ ສິງກະ​ໂປ ປະຈຳ ສປຊ ໄດ້​ສະ​ແດງ​ຄວາມ​ເສົ້າ​ສະຫລົດ​ໃຈ​ຜ່ານ​ທາງ​ໂທລະສັບ​ມາ​ຍັງ ທ່ານ​ທູດ ດຣ. ຂຽນ ພັນ​ສຸຣິວົງ ແລະ ໃນວັນທີ 19 ພຶດສະພາ 2014, ສຳນັກງານຜູ້ຕາງຫນ້າຖາວອນ ແຫ່ງ ສປປ ລາວ ປະຈຳ ອົງການ ສປຊ ກໍໄດ້ຮັບ​ສານ​ເສົ້າ​ສະຫລົດ​ໃຈ ຈາກ ທ່ານ ນາງ Helen Clark, ຜູ້​ບໍລິຫານ​ງານ​ໃຫຍ່ອົງການ ສປຊ ເພື່ອ​ການ​ພັດທະນາ (UNDP) ເຖິງ​ ​ທ່ານ ທອງ​ສິງ ທຳ​ມະ​ວົງ, ນາຍົກລັດຖະມົນຕີ ແຫ່ງ ສ​ປປ ລາວ. ໃນຕອນເຊົ້າຂອງວັນດຽວກັນ, ທ່ານ Le Hoai Trung, ​ເອກ​ອັກຄະ​ລັດຖະທູດ, ຜູ້ຕາງໜ້າ​ຖາ​ວອນ ​ແຫ່ງ ສສ. ຫວຽດນາມ ປະຈຳ ສປຊ ກໍ​ໄດ້ສະ​ແດງຄວາມ​ເສົ້າ​ສະຫລົດ​ໃຈ​ເຖິງ ​ລັດຖະບານ ​ແລະ ປະຊາຊົນ​ລາວ ຜ່ານ​ໂທລະສັບມາ​ຍັງ ​ທ່ານ​ທູດ ດຣ. ຂຽນ ພັນ​ສຸຣິວົງ​. ພ້ອມດຽວກັນນີ້, ທ່ານ E. Courtenay Rattray, ​ເອກ​ອັກຄະ​ລັດຖະທູດ, ຜູ້​ຕາງໜ້າ​ຖາວອນ ​ແຫ່ງ ຈາ​ໄມ​ກາ ປະຈຳ ສປຊ ​ແລະ ທ່ານ Patrick Lipton Robinson, ​ຜູ້​ສະໝັກ​ລົງ​ຊິງຕໍາ​ແໜ່​ງຜູ້​ພິພາກສາ​ສານ​ຍຸ​ຍິທຳ​ສາກົນ (ICJ) 2015-2024 ກໍ​ໄດ້​​​ເຂົ້າ​ພົບປະກັບ ທ່ານທູດ ດຣ. ຂຽນ ພັນ​ສຸຣິວົງ​ ເພື່ອ​ສະ​ແດງ​ຄວາມ​ເສົ້າ​ສະ​ຫລົດ​ໃຈ​ຕໍ່​ການ​ສູນ​ເສຍ​ດັ່ງກ່າວ. ນອກຈາກນັ້ນ, ບັນດາພີ່ນ້ອງ ເຊື້ອຊາດລາວທີ່ດຳລົງຊີວິດຢູ່ລັດໃກ້ຄຽງຂອງ ນິວຢອກ ກໍໄດ້ສະ​ແດງ​ຄວາມ​ເສົ້າ​ສະຫລົດ​ໃຈ​ຜ່ານ​ທາງ​ໂທລະສັບ​ມາ​ຍັງ ທ່ານ​ທູດ ດຣ. ຂຽນ ພັນ​ສຸຣິວົງ ເຊັ່ນດຽວກັນ.

ລັດຖະມົນຕີວ່າການ ກະຊວງປ້ອງກັນປະເທດ ແຫ່ງ ມາເລເຊຍ ເຂົ້າຢ້ຽມຂ່ຳນັບ ທ່ານ ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງການຕ່າງປະເທດ ສປປ ລາວ

        ໃນ​ວັນ​ທີ​ 21 ພຶດສະພາ 2014 ພະນະ​ທ່ານ Dato’ Seri Hishammuddin Tun Hussein,ລັດຖະມົນຕີວ່າການກະຊວງປ້ອງກັນປະເທດ ມາເລເຊຍ ​ໄດ້​​ເດີນທາງມາ​ຢ້ຽມຢາມ​ ສປປ ລາວ ​ແລະ ​ເຂົ້າ​ຢ້ຽມ​ຂ່ຳນັບ ພະນະ​ທ່ານ ທອງ​ລຸນ ສີ​ສຸ​ລິດ, ຮອງ​ນາຍົກລັດຖະມົນຕີ, ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ, ​​ເພື່ອຕາງ​ໜ້າ​ໃຫ້​ລັດຖະບານ ​ແລະ ປະຊາຊົນ ມາ​ເລ​ເຊຍ ​ສະ​ແດງ​ຄວາມ​​ເສົ້າ​ສະຫຼົດ​ໃຈ​ຢ່າງສຸດ​ຊຶ້ງ ​ແລະ ຄວາມ​ເຫັນ​ອົກ​ເຫັນ​ໃຈ​ຕໍ່​ລັດຖະບານ ​ແລະ ປະຊາຊົນ ສປປ ລາວ ກໍ​ຄື​ຄອບຄົວຂອງຜູ້​ປະສົບ​ເຄາະ​ຮ້າຍ, ພ້ອມ​ທັງ​ສະ​ແດງຄວາມຫວັງ​ວ່າ ລັດຖະບານ ​ແລະ ປະຊາຊົນ ສປປ ລາວ ຈະ​ສາມາດຜ່ານ​ຜ່າ​ຊ້ວງ​ເວລາ​ທີ່ເສົ້າ​​ໂສກ​ນີ້​ໄດ້.ທ່ານ ຮອງ​ນາຍົກລັດຖະມົນຕີ ສປປ ລາວ ​ໄດ້​ສະແດງຄວາມຍິນດີ ແລະ ຂອບໃຈຕໍ່ ລັດຖະມົນຕີກະຊວງປ້ອງກັນປະເທດ ມາ​ເລ​ເຊຍ ທີ່ນຳພາຄະນະຜູ້ແທນມາເລເຊຍ ເດີນທາງມາ ສປປ ລາວ ເພື່ອສະແດງຄວາມເສົ້າສະຫຼົດໃຈ ແລະ ເສຍໃຈຕໍ່ການເສຍຊິວິດຂອງການນຳຂັ້ນສູງ ​ແລະ ພະນັກງານ​ຈຳນວນ​ໜຶ່ງ. ການ​ຢ້ຽມຢາມ​ຄັ້ງ​ນີ້ ​ເປັນ​ການ​ແບ່ງ​ເບົາ​ຄວາມທຸກ​ໂສກ​ນຳປະຊາຊົນ ສປປ ລາວ ​ແລະ ຮູ້​​​ໄດ້​ເຖິງ​ຄວາມ​ເອົາ​ໃຈ​ໃສ່ ​ແລະ ​ເປັນ​ຫ່ວງ​ເປັນ​​ໄຍຂອງຜູ້ນຳ ຕະຫຼອດ​ເຖິງປະຊາຊົນ ມາ​ເລ​ເຊຍ ທີ່ ມີ​ຕໍ່ປະຊາຊົນ​ລາວ ​ແລະ ຫວັງ​ຢ່າງ​ຍິ່ງ​ວ່າທັງ​ສອງ​ກະຊວງ​ທີ່​ກ່ຽວຂ້ອງ​ຈະສືບຕໍ່ໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນໃນເວທີພາກພື້ນ ແລະ ສາກົນໃນຕໍ່ໜ້າ.

ແຕ່ງຕັ້ງຜູ້ຮັກສາການຊົ່ວຄາວລັດຖະມົນຕີປ້ອງກັນຄວາມສະຫງົບ

      ໃນວັນທີ 30 ພຶດສະພາ 2014 ຢູ່ກະຊວງປ້ອງກັນຄວາມສະຫງົບ (ປກສ) ໄດ້ຈັດພິທີປະກາດແຕ່ງຕັ້ງ ທ່ານ ພົຈວ  ສົມ​ແກ້ວ ສີ​ລາ​ວົງ ຮອງ​ເລຂາ​ຄະນະ​ພັກ, ລັດຖະມົນຕີ​ຊ່ວຍ​ວ່າການ​ກະຊວງ ປກສ ​ເປັນຜູ້ຮັກສາການຊົ່ວຄາວເລຂາຄະນະພັກ,

ລັດຖະມົນຕີວ່າການກະຊວງປ້ອງກັນ ຄວາມສະຫງົບ ໂດຍການໃຫ້​ກຽດ​ເຂົ້າ​ຮ່ວມ​ຂອງທ່ານ ຈັນສີ ໂພສີຄຳ ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີບັນດາລັດ ຖະມົນຕີຊ່ວຍວ່າການ, ຫົວໜ້າກົມ, ຮອງກົມ ແລະ ພະນັກງານຫລັກແຫລ່ງອ້ອມຂ້າງກະຊວງປ້ອງກັນຄວາມສະຫງົບ.
    ໃນພິທີທ່ານ ສູນ​ທອນ ຈິດ​ປັນຍາ ຫົວໜ້າ​ກົມ​ກໍ່ສ້າງ​ພັກ-ພະນັກງານ​ຄະນະ​ຈັດຕັ້ງສູນ​ກາງ​ພັກໄດ້ ຂຶ້ນຜ່ານມະຕິຕົກຂອງ​ຄະນະ​ເລຂາທິການ​ສູນ​ກາງ ​ພັກ, ລົງເລກທີ 55/ຄລສພ, ລົງວັນທີ 21/5/ 2014 ຂອງຄະນະເລຂາທິການສູນກາງພັກ ວ່າດ້ວຍການບົ່ງຕົວແຕ່ງຕັ້ງຜູ້ຮັກສາການຊົ່ວຄາວເລຂາ ຄະນະບໍລິຫານງານພັກກະຊວງປ້ອງກັນຄວາມສະຫງົບ  ແລະ ດຳລັດຂອງນາຍົກລັດຖະມົນຕີເລກທີ 186/ນຍ, ລົງວັນທີ 29/5/ 2014 ວ່າດ້ວຍ ການແຕ່ງຕັ້ງ ທ່ານ ພົຈວ ສົມແກ້ວ ສີລາວົງ ເປັນຜູ້ຮັກສາການ ຊົ່ວຄາວລັດຖະມົນ ຕີວ່າການກະຊວງປ້ອງກັນຄວາມສະຫງົບ.

    ໃນໂອກາດອັນມີຄວາມໝາຍຄວາມສຳຄັນນີ້ ທ່ານ ຈັນສີ ໂພສີຄຳ ໄດ້ໃຫ້ກຽດໂອ້ລົມໂດຍໄດ້ຍົກ ໃຫ້ເຫັນການປ່ຽນແປງຂອງການນຳຂອງກະຊວງປ້ອງ ກັນຄວາມສະຫງົບແມ່ນມີຄວາມຈຳເປັນຮີບດ່ວນ ຂອງວຽກງານເນື່ອງຈາກວ່າ: ເລຂາຄະນະບໍລິງານຫານພັກ, ລັດຖະມົນຕີວ່າການກະຊວງປ້ອງກັນ ຄວາມສະ ຫງົບຜູ້ເກົ່າໄດ້ເກີດອຸບັດຕິເຫດເຄື່ອງບິນຕົກໃນເວລາເຄື່ອນໄຫວວຽກງານຢູ່ແຂວງຊຽງຂວາງ ສະນັ້ນ ຈຶ່ງຕ້ອງ ໄດ້ແຕ່ງຕັ້ງຜູ້ໃໝ່ມາຮັບ ຜິດຊອບວຽກງານ ຊີ້ນຳໆພາວຽກງານ ໃນກະຊວງປ້ອງກັນຄວາມສະຫງົບ ໃຫ້ມີຜົນສຳເລັດຕາມແຜນການທີ່ວາງໄວ້ພ້ອມນີ້ ທ່ານຍັງໄດ້ຮຽກຮ້ອງ ໃຫ້ບັນດາຜູ້ເຂົ້າຮ່ວມສືບຕໍ່ເພີ່ມທະວີຊີ້ນຳໆພາວຽກງານຢ່າງຮອບດ້ານ, ມີຄວາມສາມັກຄີພາຍໃນຢ່າງແໜ້ນແຟ້ນກວ່າເກົ່າ ເພື່ອຮັບປະກັນຄວາມສະ ຫງົບ, ຄວາມເປັນລະບຽບຮຽບຮ້ອຍໃນປີ 2014-2015 ທີ່ຈະມາເຖິງນີ້ພັກ-ລັດຖະບານພວມກະກຽມສະເຫລີ​ມສະຫລອງວັນບຸນໃຫຍ່ທີ່ສຳຄັນຂອງຊາດ ສະນັ້ນ ພວກເຮົາຕ້ອງມີວຽກເຮັດຫລາຍສົມຄວນໃນການປ້ອງກັນ ເພື່ອຮັບປະກັບຄວາມປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ, ສືບຕໍ່ປັບປຸງກຳລັງ ປ້ອງກັນຄວາມສະຫງົບໃຫ້ມີຄວາມໜັກແໜ້ນ​ເຂັ້ມ​ແຂງພ້ອມກັນສຸມໃສ່ກະກຽມທຸກດ້ານ ເພື່ອຈັດກອງໃຫຍ່ຂອງ​ອົງຄະນະພັກ 3 ຂັ້ນໃຫ້ປະສົບຜົນສຳເລັດ ຢ່າງຈົບງາມ

ແຕ່ງຕັ້ງ ຜູ້ຮັກສາການຊົ່ວຄາວ ເລຂາຄະນະພັກ ເຈົ້າຄອງນະຄອນຫລວງວຽງຈັນ

ຂປລ. ໃນວັນທີ 29 ພຶດສະພາ 2014, ຢູ່ທີ່ຫ້ອງວ່າການປົກຄອງນະຄອງຫລວງວຽງຈັນ ໄດ້ມີພິທີປະກາດແຕ່ງຕັ້ງ ຜູ້ຮັກສາການເລຂາຄະນະພັກ, ເຈົ້າຄອງນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງສະຫາຍ ດຣ ບຸນປອນ ບຸດຕະນະວົງ ກຳມະການກົມການເມືອງສູນກາງພັກ, ຫົວ

ໜ້າຫ້ອງວ່າການສູນກາງພັກ, ມີບັນດາຄະນະພັກນະຄອນຫລວງ, ເຈົ້າເມືອງຈາກ 9 ເມືອງ, ຫົວໜ້າພະແນກການ, ຫ້ອງການພ້ອມດ້ວຍພະນັກງານທີ່ກ່ຽວຂ້ອງອ້ອມຂ້າງນະຄອນ ຫລວງວຽງຈັນເຂົ້າຮ່ວມ. 

ໃນພີທີ ໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ເລກທີ 56/ຄລສພ ວ່າດ້ວຍການບົ່ງຕົວແຕ່ງຕັ້ງ ຜູ້ຮັກສາການຊົ່ວຄາວ ເລຂາຄະນະ ພັກ ນະຄອນຫລວງວຽງຈັນ ແລະ ດຳລັດ ເລກທີ 187/ນຍ ວ່າດ້ວຍການແຕ່ງຕັ້ງຜູ້ຮັກສາການຊົ່ວຄາວ ເຈົ້າຄອງນະຄອນຫລວງວຽງຈັນ ຊຶ່ງມະຕິຕົກ ລົງ ແລະ ດຳລັດດັ່ງກ່າວ ໄດ້ແຕ່ງຕັ້ງ ສະຫາຍ ສົມວັນດີ ນາຖາວົງສ໌ ເປັນຜູ້ຮັກສາການຊົ່ວຄາວເລຂາຄະນະບໍລິຫານງານພັກນະຄອນຫລວງວຽງຈັນ, ເຈົ້າຄອງນະຄອນຫລວງວຽງຈັນ.

ໃນພິທີອັນມີຄວາມໝາຍສຳຄັນນີ້, ສະຫາຍ ດຣ ບຸນປອນ ບຸດຕະນະວົງ ໄດ້ໃຫ້ກຽດໂອ້ລົມ ໂດຍຍົກໃຫ້ເຫັນວ່າ: ການປ່ຽນແປງໜ້າທີ່ວຽກງານຂອງ ການນຳນະຄອນຫລວງວຽງຈັນ ໃນຄັ້ງນີ້ແມ່ນມີຄວາມຈຳເປັນອັນຮີບດ່ວນຂອງວຽກງານເນື່ອງຈາກເລຂາຄະນະບໍລິຫານງານພັກ, ເຈົ້າຄອງນະຄອນ ຫລວງວຽງຈັນຜູ້ເກົ່າໄດ້ເສຍຊີວິດຈາກອຸບັດເຫດເຮືອບິນ ຕົກໃນເວລາເຄື່ອນໄຫວວຽກງານ ສະນັ້ນ ຈຶ່ງຕ້ອງໄດ້ແຕ່ງຕັ້ງຜູ້ໃໝ່ ເພື່ອມາຮັບຜິດ ຊອບວຽກງານຊີ້ນຳນຳພາຂອງນະ ຄອນຫລວງວຽງຈັນໃຫ້ສາມາດດຳເນີນ ຕໍ່ໄປຢ່າງມີຜົນສຳເລັດຕາມແຜນການທີ່ວາງໄວ້, ພ້ອມນີ້ ສະຫາຍຍັງ ຮຽກຮ້ອງ ໃຫ້ອຳນາດການປົກຄອງທຸກຂັ້ນຂອງນະຄອນຫລວງວຽງຈັນ ພ້ອມກັນສືບຕໍ່ຊີ້ນຳນຳພາວຽກງານຮອບດ້ານຂອງນະຄອນຫລວງວຽງຈັນ ໃຫ້ຜົນສຳເລັດ ຈົບງາມຕາມແຜນການທີ່ວາງໄວ້, ໂດຍສະເພາະແມ່ນການກະກຽມດຳເນີນ ກອງປະຊຸມໃຫຍ່ອົງຄະນະພັກເມືອງແຕ່ລະເມືອງໃຫ້ມີຜົນ ສຳເລັດ, ສືບຕໍ່ເຄື່ອນໄຫວຊີ້ນຳນຳພາການຈັດຕັ້ງປະຕິບັດວຽກງານສາມສ້າງໃຫ້ມີຄວາມຄືບໜ້າ ແລະ ຍາດໄດ້ຜົນສຳເລັດອັນໃຫຍ່ຫລວງ ເພື່ອເປັນ ຜົນງານຂ່ຳນັບຮັບຕ້ອນກອງປະຊຸມໃຫຍ່ ຄັ້ງທີ X ຂອງ​ພັກທີ່ຈະມາເຖິງນີ້./.