ຄະນະຜູ້ແທນຂັ້ນສູງແຂວງອຸດົມໄຊ ເດີນທາງເຂົ້າຮ່ວມງານມະຫາກໍາໂຍນໝາກຄອນ 03 ປະເທດ ຄັ້ງທີ 5 ທີ່ ເມືອງຈຽງເຊີນ ແຂວງຢຸນນານ ນະຄອນຟູເອີ ແຫ່ງ ສປ ຈີນ ລະຫວ່າງ ວັນທີ 29 ທັນວາ 2017 – ວັນທີ 02 ມັງກອນ 2018

        ຄະນະຜູ້ແທນຂັ້ນສູງແຂວງອຸດົມໄຊ ນໍາໂດຍ ທ່ານ ໂອວາດ ຈັນທະວົງ ຄະນະປະຈໍາພັກແຂວງ ປະທານແນວລາວສ້າງຊາດ ປະຈໍາແຂວງອຸດົມໄຊ ພ້ອມດ້ວຍຄະນະ ຈຳນວນ 08 ທາ່ນ, ເດີນທາງເຂົ້າຮ່ວມງານມະຫາກໍາໂຍນໝາກຄອນ 03 ປະເທດ ຄື:  ສປ ຈີນ – ສປປ ລາວ  ແລະ ສສ ຫວຽດນາມ ຄັ້ງທີ 5, ທີ່ ເມືອງຈຽງເຊີນ ແຂວງຢຸນນານ ນະຄອນຟູເອີ ແຫ່ງ ສປ ຈີນ, ໃຫ້ກຽດມາຕ້ອນຮັບໂດຍທ່ານ ຮອງເຈົ້າເມືອງ ເມືອງຈຽງເຊີນ ແລະ ພິທີຕ້ອນຮັບຢ່າງເປັນທາງການທີ່ ໂຮງແຮມສາກົນທຽນຮາວ ເມືອງຈຽງເຊີນ ນໍາໂດຍ ທ່ານ ສີວມິງ ເລຂາພັກເມືອງຈຽນເຊີນ ພ້ອມດ້ວຍຄະນະທີມງານຫ້ອງການປົກຄອງເມືອງ ແລະ ຫົວໜ້າການພົວພັນຕ່າງປະເທດປະຈໍາເມືອງ, ໃນເມື່ອກ່ອນພົວພັນ, ພົບປະຖອດຖອນບົດຮຽນກັບບັນດາແຂວງ, ເມືອງທີ່ມີຊາຍແດນຕິດຈອດ ແລະ ເມືອງທີ່ໄກ້ຄຽງກັບ ສປ ຈີນ ແລະ ສປປ ລາວ ເວົ້າລວມ, ເວົ້າສະເພາະ ແຂວງອຸດົມໄຊ     ແຫ່ງ

ສປປ ລາວ ກັບ ບັນດາແຂວງ, ເມືອງຊາຍແດນ ແລະ ເມືອງໄກ້ຄຽງ ແຫ່ງ ສປ ຈີນ ແມ່ນບໍ່ທັນເຮັດໄດ້ດີເທົ່າທີ່ຄວນ ໂດຍສະເພາະ ການພົວພັນກັບ ນະຄອນຟູເອີ ແລະ ເມືອງຈຽງເຊີນ ເນື່ອງຈາກເມື່ອກ່ອນສອງເມືອງດັ່ງກ່າວ ແມ່ນບໍ່ທັນໄດ້ເປີດກວ້າງພົວພັນກັບປະເທດຊາຍແດນ, ແຕ່ມາຮອດປະຈຸບັນແມ່ນໄດ້ເປີດປະຕູສູ່ພາຍນອກ ໂດຍສະເພາະໄດ້ມີການພົວພັນເປັນວົງກວ້າງກັບ ສປປ ລາວ ແລະ ສສ ຫວຽດນາມ ເຊິ່ງມັນສະແດງອອກໃນການພົບປະແລກປ່ຽນ ແລະ ຖອດຖອນບົດຮຽນໃນຄັ້ງນີ້ ແມ່ນມີຄວາມໝາຍເລີກເຊີ່ງຄື: ລາວ-ຈີນ ເປັນຄູ່ຮ່ວມມືຍຸດທະສາດ ເວົ້າລວມ, ເວົ້າສະເພາະ ແຂວງອຸດົມໄຊ ແລະ ນະຄອນຟູເອີ ແມ່ນມີຈຸດພິເສດທາງດ້ານພື້ນຖານໂຄງລ່າງທີ່ໄກ້ຄຽງ, ເອື້ອອຳນວຍໃນການພົວພັນ, ພົບປະແລກປ່ຽນ ແລະ ຖອດຖອນບົດຮຽນ ຕາມນະໂຍບາຍ ໜຶ່ງແລວທາງ, ໜຶ່ງເສັ້ນທາງ, ເພື່ອເປັນການຊອກຫາ ແລະ ເປີດເສັ້ນທາງໃນການພົວພັນແລກປ່ຽນສິນຄ້າ ຂາອອກ-ຂາເຂົ້າ ແລະ ເສັ້ນທາງເສດຖະກິດທ່ອງທ່ຽວຮ່ວມກັນ, ເປັນການສຳພັນຖະວະໄມຕີ ລະຫວ່າງ ສປປ ລາວ ກັບ ສປ ຈີນ ເວົ້າລວມ, ເວົ້າສະເພາະ ແຂວງອຸດົມໄຊ ສປປ ລາວ ກັບ ເມືອງຈຽງເຊີນ ສປ ຈີນ ແມ່ນການສົ່ງເສີມ, ອານຸລັກຮີດຄອງປະເພນີວັດທະນະທຳ ແລະ ການນຸ່ງຖືຂອງຊົນເຜົ່າ ເພື່ອເປັນຈຸດດຶງດູດນັກທ່ອງທ່ຽວໃນຂົງເຂດຊາຍແດນຂອງສາມປະເທດ.

        ຄະນະຜູ້ແທນຂັ້ນສູງ 02 ປະເທດ ໄດ້ພົບປະແລກປ່ຽນ ແລະ ຖອດຖອນບົດຮຽນແບບພິທີການ ກັບ ທ່ານເລຂາພັກເມືອງ, ປຶກສາທາງດ້ານການເມືອງ, ແນວໂຮມເມືອງ ກ່ຽວກັບບັນຫາການພົວພັນ ລະຫວ່າງ ເມືອງຈຽງເຊີນ ສປ ຈີນ ກັບ ແຂວງອຸດົມໄຊ (ເມືອງໄຊ ແລະ ເມືອງນາໝໍ້) ໃຫ້ສືບຕໍ່ຂະຫຍາຍການພົວພັນໃຫ້ກວ້າງຂວາງ ແລະ ຕໍ່ເນື່ອງຢ່າງປົກກະຕິ.

ພິທີເປີດງານບຸນມະຫາກໍາໂຍນໝາກຄອນ ຄັ້ງທີ່ 05 ຢ່າງເປັນທາງການ ໃນວັນທີ 02 ມັງກອນ 2018, ຫຼັງຈາກສໍາເລັດພິທີດັ່ງກ່າວ ຄະນະຜູ້ແທນຂັ້ນສູງໄດ້ເຄື່ອນໄຫວຕິດຕາມຊົມບັນດາກິດຈະກຳການແຂ່ງຂັນຕ່າງໆເຊັ່ນ: ການແຂ່ງຂັນກິລາ, ສິນລະປະ-ວັນນະຄະດີ ຂອງ ສາມປະເທດ ແລະ ຮ່ວມພິທີ່ປິດງານຢ່າງເປັນທາງການ.