ຄະນະຜູ້ແທນຂັ້ນສູງແຂວງອຸດົມໄຊໄປຢ້ຽມຢາມ ແລະ ເຮັດວຽກຢຸ່ບັນດາແຂວງພາກເໜືອຂອງ ສສ ຫວຽດນາມ

ໃນໂອກາດເດີນທາງໄປຢ້ຽມຢາມ ແລະ ເຮັດວຽກຢຸ່ບັນດາແຂວງພາກເໜືອຂອງ ສສ ຫວຽດນາມ ມາໃນລະຫວ່າງ ວັນທີ 7-8 ພະຈິກ ນີ້ ຄະນະຜູ້ແທນຂັ້ນສູງແຂວງອຸດົມໄຊ ສປປ ລາວ ເຊິ່ງນຳໂດຍ ທ່ານ ເພັດສາຄອນ ຫລວງອາໄພ ກຳມະການສູນກາງພັກເລຂາພັກແຂວງ, ເຈົ້າແຂວງອຸດົມໄຊ ພ້ອມຄະນະພັກອົກການປົກຄອງແຂວງກໍໄດ້ໄປຢ້ຽມຢາມມິດຕະພາບກັບຄະນະຜູ້ແທນຂັ້ນສູງແຂວງເຊີນລາ ແຫ່ງ ສສ ຫວຽດນາມ ໂອກາດດັ່ງກ່າວກໍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ຮ່ວງວັນເຈິດ ເລຂາພັກແຂວງ ປະທານສະພາປະຊາຊົນແຂວງເຊີນລາ ພ້ອມດ້ວຍການນຳ ພັກ-ລັດ ແຂວງເຊີນລາ,ໃນການຢ້ຽມຢາມຂອງຄະນະຜູ້ແທນຂັ້ນສູງແຂວງອຸດົມໄຊ ກ່ອນອື່ນຄະນະຜູ້ແທນກໍໄດ້ລົງເບິ່ງພື້ນຖານ ການຜະລິດພາຍໃນແຂວງເຊີນລາວ ເປັນຕົ້ນແມ່ນ ເບິ່ງການລ້ຽງງົວນົມ ແລະໂຮງງານປຸງແຕ່ງນົມງົວຢ້ຽມຢາມເຂື່ອນໄຟຟ້ານ້ຳລາ ຫລັງຈາກນັ້ນ ຄະນະຜູ້ແທນຂັ້ນສູງແຂວງອຸດົມໄຊ ແຫ່ງ ສສ ຫວຽດນາມກໍໄດ້ເຂົ້າພົບປະກັບຄະນະຜູ້ແທນຂັ້ນສູງແຂວງເຊີນລາຢູ່ທີຫ້ອງປະຊຸມຂອງ
ແຂວງເຊີນລາ. 

          ການພົບປະຄະນະຜູ້ແທນທັງສອງຝ່າຍກໍໄດ້ລາຍງານສະພາບການພັດທະນາເສດຖະກິດ-ສັງຄົມ ໃຫ້ກັນຊາບ. ຂະນະດຽວກັນ ທ່ານເພັດສາຄອນ ຫລວງອາໄພ ເລຂາພັກແຂວງ, ເຈົ້າແຂວງອຸດົມໄຊ ໄດ້ກ່າວສະແດງຄວາມຂອບໃຈເປັນຢ່າງສູງຕໍ່ການຕ້ອນຮັບຢ່າງອົບອຸ່ນ ແລະພ້ອມທັງສະແດງຄວາມຊົມເຊີຍຕໍ່ຫມາກຜົນການພັດທະນາເສດຖະກິດ – ສັງຄົມຂອງຄະນະພັກແຂວງເຊີນລາ ທີ່ຍາດມາໄດ້ລວມທັງຫມາກຜົນການພົວພັນຮ່ວມມືຂອງສອງພັກ – ສອງລັດໃນຊຸມປີຜ່ານມາ; ການພົບປະຄະນະຜູ້ແທນທັງສອງຝ່າຍເປັນຂີດຫມາຍສຳຄັນຕໍ່ຄວາມສາມັກຄີມິດຕະພາບ ແບບພິເສດ ແລະ ການຮ່ວມມືຮອບດ້ານເຊິ່ງທັງສອງຄະນະພັກແຂວງແມ່ນໄດ້ພ້ອມກັນປຶກສາຫາລືຫລາຍບັນຫາ ເປັນຕົ້ນແມ່ນສ້າງໃຫ້ມີການຮຽກສ່ຽວ ລະຫວ່າງເມືອງຕໍ່ເມືອງເພື່ອແລກປ່ຽນບົດຮຽນການພັດທະນາດ້ານຕ່າງໆ ໂດຍສະເພາະແມ່ນດ້ານກະສິກໍາຕິດພັນກັບການທ່ອງທ່ຽວ ພ້ອມນີ້ຄະນະພັກແຂວງເຊີນລາຍັງໄດ້ມອບທຶນຈຳນວນ ຕື້ດົງ ສະກູນເງິນຫວຽດນາມໃຫ້ແກ່ຄະນະພັກແຂວງອຸດົມໄຊ ເພື່ອນຳໃຊ້ເຂົ້າໃນການພັດທະນາແຂວງອຸດົມໄຊ. ໃນທິດທາງຕໍ່ຫນ້າທັງສອງຄະນະພັກຍັງຈະມີການສືບຕໍ່ຜັດປ່ຽນກັນຢ້ຽມຢາມສ້າງໂອກາດໃຫ້ພະນັກງານວິຊາການບັນດາຂະແຫນງການທັງສອງຝ່າຍໄດ້ແລກປ່ຽນຖອດຖອນບົດຮຽນ ເຊິ່ງກັນແລະກັນເພື່ອສ້າງໃຫ້ຄວາມສາມັກຄີ ແລະການຮ່ວມມືຮອບດ້ານນັບມື້ນັບມີຄວາມແຫນ້ນແຟ້ນຍິ່ງຂຶ້ນ.