ຄະນະຜູ້ແທນຂັ້ນສູງແຂວງນາມດີ້ງ ແຫ່ງ ສສ ຫວຽດນາມ ມາຢ້ຽມຢາມ ແລະ ເຮັດວຽກນໍາການນໍາແຂວງອຸດົມໄຊ

ເວລາ 18:30 ນາທີ ຂອງວັນທີ 2 ສິງຫາ 2017, ຄະນະຜູ້ແທນຂັ້ນສູງແຂວງນາມດີ້ງ ແຫ່ງ ສສ ຫວຽດນາມ ນໍາໂດຍ ສະຫາຍ ຟ້າມດິງຫງິ, ຮອງເລຂາພັກແຂວງ, ເຈົ້າແຂວງ, ແຂວງນາມດິ້ງ ພ້ອມດ້ວຍຄະນະ 11 ສະຫາຍ, ຍິງ 0 ສະຫາຍ; ໄດ້ມາຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ ພິທີຕ້ອນຮັບຢ່າງເປັນທາງການທີ່ໂຮງແຮມມິດຕະພາບແຂວງອຸດົມໄຊ ນໍາໂດຍ ສະຫາຍ ບຸນລອດ ອ່ອນພະຈັນ, ຮອງເລຂາພັກແຂວງ, ປະທານສະພາປະຊາຊົນແຂວງອຸດົມໄຊ ພ້ອມດ້ວຍການນໍາແຂວງ ແລະ ພະນັກງານລັດຖະກອນອ້ອມຂ້າງແຂວງເຂົ້າຮ່ວມ ທັງໝົດ 25 ສະຫາຍ, ຍີງ 06 ສະຫາຍ ເຕັມໄປດ້ວຍບັນຍາກາດອົບອຸ່ນ.

ວັນທີ 03 ສິງຫາ 2017, ເວລາ 08:00 ນາທີ ຄະນະຜູ້ແທນຂັ້ນສູງສອງຝ່າຍໄດ້ໄປວາງພວງມາລາທີ່ອານຸສາວະລີນໍ້າໃຈສາມັກຄີສູ້ຮົບ ລາວ-ຫວຽດນາມ ທີ່ບ້ານມອນໃຕ້, ເມືອງໄຊ, ແຂວງອຸດົມໄຊ  ນໍາໂດຍ ສະຫາຍ ຄໍາພຽງ ຢາຈົງວາ , ຮອງເລຂາພັກແຂວງ, ຮອງເຈົ້າແຂວງອຸດົມໄຊ;  ໃນເວລາ 08:30 ນາທີ ຄະນະຜູ້ແທນຂັ້ນສູງທັງສອງຝ່າຍເຂົ້າພົບປະເຮັດວຽກຢ່າງເປັນທາງການ ທີ່ ຫ້ອງປະຊຸມຊັ້ນ 3 ຫ້ອງວ່າການປົກຄອງແຂວງອຸດົມໄຊ, ຄະນະຜູ້ແທນຂັ້ນສູງຝ່າຍແຂວງອຸດົມໄຊ ນໍາໂດຍ ສະຫາຍເພັດສາຄອນ ຫຼວງອາໄພ ກໍາມະການສູນກາງພັກ, ເລຂາພັກແຂວງ-ເຈົ້າແຂວງອຸດົມໄຊ ພ້ອມດ້ວຍຄະນະປະຈໍາພັກແຂວງ, ກໍາມະການພັກແຂວງ ແລະ ຫົວໜ້າບັນດາພະແນກ ທັງໝົດ 17 ສະຫາຍ, ຍິງ: 0 ສະຫາຍ; ຄະນະຜູ້ແທນຂັ້ນສູງຝ່າຍ ແຂວງນາມດີ້ງ ສສ ຫວຽດນາມ ນໍາໂດຍ ສະຫາຍ ຟ້າມດິງຫງິ, ຮອງເລຂາພັກແຂວງ, ເຈົ້າແຂວງ-ແຂວງນາມດິ້ງ ພ້ອມດ້ວຍຄະນະ 11 ສະຫາຍ, ຍິງ 0 ສະຫາຍ.  

          ພິທີພົບປະ, ຕາງໜ້າຄະນະຜູ້ແທນສອງຝ່າຍໄດ້ຜັດປ່ຽນກັນແຈ້ງສະພາບ, ຈຸດພິເສດຂອງແຂວງ ແລະ ການພັດທະນາເສດຖະກິດ – ສັງຄົມ, ວຽກງານ ປກຊ-ປກສ, ວຽກງານຊີ້ນໍາ-ນໍາພາພັດທະນາເສດຖະກິດ-ສັງຄົມ ໃນໄລຍະທີ່ຜ່ານມາໃຫ້ສອງຝ່າຍຮັບຮູ້ ເຊິ່ງກັນ ແລະ ກັນ ດ້ວຍນໍ້າໃຈໄມຕີຈິດແຫ່ງຄວາມສາມັກຄີມິດຕະພາບແບບພິເສດ ເພື່ອເພີ່ມທະວີສາຍພົວພັນດ້ານການຮ່ວມມືໃນຊຸ່ມປີທີ່ຜ່ານມາ, ໄດ້ເອກະພາບກັນວາງທິດທາງການຮ່ວມມື ປີ 2017 – 2021 ແລະ ພ້ອມກັນປະຕິບັດຕາມບົດບັນທຶກຊ່ວຍຈໍາ ລະຫວ່າງ ແຂວງອຸດົມໄຊ – ແຂວງນາມດິ້ງ ໃຫ້ປະກົດຜົນເປັນຈິງ ແລະ ຈະເລີນງອກງາມຕະຫຼອດໄປ.
ການພົບປະປືກສາຫາລືຄັ້ງນີ້ ສອງແຂວງອຸດົມໄຊ-ນາມດິ້ງ ໄດ້ເຊັນບົດບັນທຶກຊ່ວຍຈໍາຮ່ວມກັນ,ສອງຝ່າຍເຫັນດີໃຫ້ມີການຜັດປ່ຽນຄະນະຜູ້ແທນຂອງສອງຝ່າຍ, ໃນໄລຍະ 2 ປີ ເຄີ່ງ ຈະຈັດກອງປະຊຸມພົບປະຢ້ຽມຢາມ 01 ຄັ້ງ ໂດຍການຜັດປ່ຽນກັນເປັນເຈົ້າພາບ ເພື່ອແນ່ໃສ່ເພີ່ມທະວີນໍ້າໃຈມິດຕະພາບຄວາມສາມັກຄີແບບພິເສດ, ການຮ່ວມມືດ້ານການກໍ່ສ້າງພັກ, ດ້ານກະສິກໍາ, ດ້ານການຄ້າ, ການລົງທຶນ-ທ່ອງທ່ຽວ ແລະ ການຮ່ວມມືດ້ານການສຶກສາກໍ່ສ້າງຊັບພະຍາກອນມະນຸດ, ໃນນັ້ນໃນໄລຍະ 05 ປີ ແຂວງນາມດິ້ງເຫັນດີຈະຊ່ວຍເຫຼືອແຂວງອຸດົມໄຊທຶນກໍ່ສ້າງຊັບພະຍາກອນມະນຸດກໍ່ຄືນັກສຶກສາແຂວງອຸດົມໄຊ ຈໍານວນ 05 ທຶນ/ປີ ລະດັບປະລິນຍາຕີ ແລະ ຊ່ວຍພະນັກງານແຂວງອຸດົມໄຊ ໄປຮຽນເຊື່ອມຕໍ່ລະດັບເໜືອກວ່າປະລິນຍາຕີ ປະມານ 1-2 ທຶນ; ພາຍຫຼັງສໍາເລັດ 05 ປີ ສອງແຂວງຈະສະຫຼຸບຕີລາຄາໝາກຜົນຂອງການສຶກສາ, ເພື່ອສ້າງແຜນການກໍ່ສ້າງໃນໄລຍະຕໍ່ໄປ ກອງປະຊຸມໃຊ້ເວລາ 01 ຕອນ ແລະ  ພິທີພົບປະດໍາເນີນຮອດ ເວລາ 10: 30 ນາທີ ກໍ່ໄດ້ກ່າວປິດລົງຢ່າງເປັນທາງການເຕັມໄປດ້ວຍອັນບັນຍາກາດໄມຕີຣຈິດ, ມິດຕະພາບແບບພິເສດອັນອົບອຸ່ນ.

ວັນທີ 4 / 8 / 2017 ນໍາໂດຍ ສະຫາຍ ຄໍາພຽງ ຢາຈົງວາ ຮອງເລຂາພັກແຂວງ, ຮອງເຈົ້າແຂວງອຸດົມໄຊ ກັບ ສະຫາຍ ຟ້າມ ດິງຫງິ ຮອງເລຂາພັກແຂວງ, ເຈົ້າແຂວງນາມດິ້ງ ແຫ່ງ ສສ ຫວຽດນາມ ເຂົ້າພົບປະອາດີດພະນັກງານ ແລະ ນັກສຶກສາລາວທີ່ຮຽນຈົບຈາກແຂວງຮ່ານາມນິງ ກໍ່ຄື ແຂວງນາມດິ້ງ ຢູ່ທີ່ ຫ້ອງປະຊຸມພະແນກການຕ່າງປະເທດແຂວງອຸດົມໄຊ, ອາດີດນັກສຶກສາເຂົ້າຮ່ວມທັງໝົດ 13 ສະຫາຍ, ຍີງ 01 ສະຫາຍ.

ໂດຍ ສະຫາຍ ໄມ່ວອງ ຍອດມະນີ ອາດີດ ຮອງຫົວໜ້າພະແນກການຕ່າງປະເທດແຂວງອຸດົມໄຊ,  ອາດີດນັກສຶກສາຮຽນຈົບມາຈາກແຂວງນາມດີ້ງ ໄດ້ລາຍງານລວມສະພາບການເຄື່ອນໄຫວຂອງອາດີດພະນັກງານ, ນັກສຶກສາລາວທີ່ໄດ້ຮຽນຈົບຈາກແຂວງຮ່ານາມນິງ ກໍ່ຄື ແຂວງນາມດິ້ງ ສສ ຫວຽດນາມ ນັບແຕ່ປີ 1970 – 2014  ມີນັກສຶກສາ ແລະ ພະນັກງານເຄີຍຮຽນຈົບ ຫຼື ການບໍາລຸງຍົກລະດັບຈາກແຂວງນາມດິ້ງ ມີທັງໝົດປະມານ 130 ຄົນ, ນອກຈາກນັ້ນ ທ່ານ ຍັງກ່າວຂອບອົກຂອບໃຈ ໃນການຊ່ວຍເຫຼືອ ແລະ ສະຫນັບສະຫນູນຈາກການນໍາແຂວງນາມດິ້ງ,  ກໍ່ຄືພໍ່ແມ່ປະຊາຊົນ, ຄູອາຈານ, ໝູ່ເພື່ອນ ທີ່ໄດ້ໃຫ້ການຊ່ວຍເຫຼືອຕະຫຼອດຮອດທຶນຮອນ, ດ້ານຄວາມຮູ້-ຄວາມສາມາດ, ປະສົບການຕ່າງໆໃຫ້ພະນັກງານ, ນັກສຶກສາລາວກໍ່ຄືແຂວງອຸດົມໄຊ.

ຈາກນັ້ນ ຄະນະຜູ້ແທນຂັ້ນສູງສອງຝ່າຍໄດ້ອອກເດີນທາງໄປທ່ຽວຊົມທໍາມະຊາດຕາດນໍ້າກັດຍໍລະປາ ດ້ວຍຄວາມເບີກບານມ່ວນຊື່ນ ແລະ ພິທີສົ່ງຄະນະຜູ້ແທນຂັ້ນສູງແຂວງນາມດີ້ງຢ່າງເປັນທາງການທີ່ນໍ້າກັດຍໍລະປາ ນໍາໂດຍ ສະຫາຍ ເພັດສາຄອນ ຫຼວງອາໄພ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງອຸດົມໄຊ,  ພ້ອມດ້ວຍຄະນະປະຈໍາພັກແຂວງ, ກໍາມະການພັກແຂວງ ແລະ ຫົວໜ້າບັນດາພະແນກທີ່ກ່ຽວຂ້ອງກັບຄືນປະເທດດ້ວຍຄວາມສະຫວັດດີພາບ.